【下世唔做樹】檔案管理極懷舊 朱福強：政府電郵列印再存檔

朱福強一世人只打過一份工，退休前是檔案處處長 (署理）。0七年告老歸田後，也沒有變成閒雲野鶴，與高等法院原訟庭前法官王式英等人成立「檔案行動組」，倡議設立《檔案法》，「老實講，倡議一樣嘢十年都唔係好長。香港好多嘢，倡議極都冇啦。」「咁咪盡做囉。香港社會，人哋話好多嘢都爛晒，呢度爛晒、嗰度爛晒。宏觀上做唔到啲乜，但我覺得喺個人層面可以做啲嘢。人人都做啲嘢、逐啲逐啲，只能夠係咁。」

七十初渡，無謂再爭朝夕，但《檔案法》總算有下文。法律改革委員會轄下的檔案法小組閉關五年，終於在去年十二月推出諮詢文件，內容卻是極保守，「又話唔包公共機構、又話唔想有刑責、又話唔希望檔案處由專業領導。檔案開放、資料公開的部分又唔睇，留俾《資訊自由法》小組去睇。咁你立嚟做咩啫？呢個咁嘅法。」「根據佢而家的意向立法，係會衰過而家。」

將來有幾衰或未可料，現時沒有《檔案法》，荒謬早已浪接浪：一六年橫洲黑幕，政府暗 中向鄉黑摸底，被傳媒揭發後，時任運輸及房屋局局長張炳良聲稱「沒有紀錄」，後來又打倒昨日的我。沙中線淪為豆腐渣工程 ，大量施工紀錄人間蒸發、甚至不曾存在，一樣未有人落鑊。「《檔案法》裡面，唔使話銷毀，你唔立檔已經係犯法。」「立檔存檔、專業管理，係講緊市民嘅監察、政府嘅問責、良好嘅管治。重要嘅紀錄入咗歷史檔案，將來就係社會嘅集體回憶。」

封存期過去，檔案必需對外開放。928是誰下令發放催激彈？傳聞中警方準備發放實彈，是否真有其事？若《檔案法》有靈，這些迷團假以時日都要公開，「喺而家喺呢個政權下，我哋奈佢地唔何。但難保有一日，政權更換變咗民主社會，追究喺上嚟，檔案咪可以將相關嘅人繩之於法囉。」「你銷晒（所有文件）未必有可能，somehow、somewhere喺架構裡面，係會留低蛛絲馬跡。」

想得太遠。現實是香港政府視檔案如無物，管理仍停留在石器時代，「佢個諮詢文件都提到，電郵仲係print and file，打印出來、當紙張文件咁儲存。對環保有好大影響。2001年已經講緊要發展軟件去管理，包括電郵點歸類、點存廢、將來係咪去檔案館，成個流程。差不多過咗廿年，中間發生咩事呢？」

記者：蔡慧敏
攝影：胡智堅

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...