【十二月擺酒】拍拖一年結婚 江若琳的名字 蕭潤邦的姓氏

Oscar同Elanne相識十年，由朋友變戀人，拍拖一年決定結婚，對的時候遇上對的人，係生命中最好嘅事。Oscar說：「其實我哋一齊後，真係好合拍，所有生活習慣都好似，連近視度數都一樣，所以無話邊一刻決定，成件事好自然，我哋應該都會一路好快樂、好自然咁生活落去。」Elanne說：「我係一個非常無安全感嘅人，同埋我唔係好識同人溝通，但唔知點解，當我遇到佢嘅時候，由上海大家傾偈開始，我覺得對住佢可以好放開自己，佢係一個好識得同人哋傾偈，同埋佢好識得去開解人，我覺得而家都好少男仔會真係用心去聽你嘅經歷、故事，甚至乎佢好投入喺我嘅經歷裡面，有時我同佢講我嘅經歷，佢仲嬲過我，即使我已經放低咗，好多男仔其實都係好敷衍，但佢真係會好投入，直至同佢相處，我發覺原來可以喺一個人面前，咁願意去表達自己情感，嗰時開始覺得，會唔會係呢個人喺我隔籬，令我身心都好有安全感，只要佢喺我隔籬，我覺得好多嘢都好似好易解決。」

Oscar為咗向Elanne求婚，用咗兩個月時間去籌備，仲紋埋愛的紋身，好鬼sweet！他說：「預備咗兩個月，其實係喺佢舉行音樂會嘅時候，因為當時好多朋友都專登嚟睇佢，我就喺咁嘅情況之下召集好友，話俾佢哋聽邊一日，睇吓佢哋有冇時間去上海同我做呢單大茶飯。」不如又等佢哋講吓幾時開始對大家有feel，由朋友變戀人啦！Oscar說：「我哋識咗十年，但真係兩個人食飯就係喺上海，因為我煮上海菜，所以每年都會去上海好似考察咁樣，食吓佢哋啲嘢，睇吓有啲乜嘢新派上海菜帶番嚟香港，07年嗰班新人有個WhatsApp group，我就話自己會去上海，聽講你（Elanne）都喺上海打滾咗好多年，咁啱佢又喺上海，就係咁樣，大家第一次去食飯、傾偈。」Elanne又說：「十幾年嚟第一次兩個人真係單獨食飯，但其實初初都係好朋友嗰種，喺內地咁多年都係自己一個，突然間有個香港朋友上咗嚟，難得有人同我食餐飯。」

相關新聞:
【轉咗行都唔知！】江若琳懵盛盛 蕭潤邦：罰佢食一世
http://bit.ly/2Ep6m9e

【好鍾意小朋友】30歲江若琳嫁37歲蕭潤邦 計劃婚後即造人
http://bit.ly/2ChB0vv

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinefansclub