郭文貴榮升燈神 王岐山傅政華愈燈愈旺

流亡美國嘅中國富豪郭文貴一度係中國政壇嘅話題人物，事關佢成日「爆料」話前中紀委書記王岐山、前中央政法委書記孟建柱等等高官腐敗、走資、洗黑錢嘅內幕。郭文貴上年不停咁話，習近平已經查緊王岐山，又話王岐山唔會做國家副主席。俾佢講咗咁耐，王岐山轉個頭就當選咗，唔話郭文貴係燈神都唔得啦。

話說今年兩會期間，一直醜聞纏身嘅前中央軍委副主席范長龍，向仲未當選國家副主席嘅王岐山當面敬咗個軍禮，好多媒體都認為，咁代表王岐山即將擔任要職。

郭文貴過幾日拍咗段片話：「軍人在見服務員都這麼敬個禮，都穿着衣服敬個禮，現在給王岐山敬禮也拿出來湊文章……王岐山要當了副主席。我告訴你，那是中國不將是大亂，中國是暴亂。有點常識行不行？」

佢喺自己嘅網站「Guo Media（郭媒體）」亦都寫道：文貴認為王岐山根本不可能當國家副主席」。殊不知，俾郭文貴咁燈一燈，王岐山真係做咗國家副主席。先敗一仗嘅郭文貴再猜測：「接下來這件事是往下走，中國內部將實行全民經濟被剪羊毛（抽走社會的熱錢）」。到底呢個預言會否成真，《壹》仔就拭目以待啦。

郭文貴其實有好多戰績，例如佢成日話現任公安部副部長傅政華會被人查，傳聞係有嘅，但佢獲提名做司法部長。又話自己有朋友證實咗，王岐山同前中央政法委書記孟建柱幾年前講過，會夾手夾腳做低宜家嘅中組部部長陳希，但身為習近平舊交嘅陳希，十九大後不單止由副部長轉正，仲成為近三十年嚟，第一個非政治局常委嘅中央黨校校長。

俾郭文貴燈嘅都升官，政壇燈神可謂當之無愧。

撰文：巫不言

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...