【最過癮財經新聞 】老闆姓「膠」？領展the second基滙資本大起底 曾與大鱷打拆骨戰

去年牽頭斥資共＄350億向領展購入商場及停車場的基滙資本（Gaw Capital）隨即加租兼趕走舊租客﹐搞到神憎鬼厭。咪以為呢個私募基金係過江龍，英文係Gaw，註音:「膠」，Gaw吳姓也，吳氏家族其實都可以講係本地富豪，基金嘅主持人係吳繼煒Goodwin Gaw）及吳繼泰（Kenneth Gaw）兩兄弟。
德昌電機（179）主席汪穗中咪喺佢哋舅父囉。兩兄弟分別畢業於美國長春藤大學Brown University及University of Pennsylvania，其父吳仲燦係泰國華僑，廿幾年前揸住間建生實業上市公司，曾經同對沖基金一班鬼佬開拖，就係勵晶太平洋啦，呢班鬼佬可以講係（Activism）基金嘅鼻祖，即係同啲唔長進嘅上市公司打爛仔交。當時建生實業持有盤谷銀行及華光航運股權，資產豐厚，但公司股價長期低水，資產淨值有成六、七成折讓。於是班鬼佬就從李嘉誠手上接過近兩成嘅建生股份，諗住食大茶飯，向吳氏家族開刀，要求建生賣掉資產派息，當時患病在美國休養的吳仲燦派出 當時只有廿五歲嘅仔吳繼泰以及老婆汪靜宜去對付班鬼佬，自己就係後邊同班鬼佬過招，班鬼佬踢爆吳仲燦係史丹福大學碩士假學歷，激到佢紮紥跳，隔空傳真寫信大罵班鬼佬係垃圾，係攞住人哋啲錢四處走嘅瘋狗，仲叫佢哋最好去 睇醫生驗下有無瘋狗症喎！ 真係最過癮嘅財經新聞。
不過搞咗場大龍鳳，勵晶班鬼佬都不得要領，吳氏又唔肯買番佢哋手上嘅股份，無功而回。1998年女病逝美國，終年不到六十歲。1999年，兩兄弟將建生實業私有化，變賣某些資產後，2005年就創立Gaw Capital，乘住東南亞及香港地產升浪，基金越發越大，投資遍佈美國 、英國、泰國、大陸，又有酒店又有寫字樓及商場，旗下管理資產達170億美元（1360億港元)，在地產及金融界是當紅炸子雞，公司的投資合夥人吳燕安（Christina Gaw）是吳仲燦女兒，曾在投行高盛任職，是社交圈的活躍靚太。
撰文：宗菁華



《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...