【埋門撻Q】方國珊廣告突然冇得上架 向廉記舉報民建聯施壓

仲有兩個星期就舉行立法會補選，新東嘅激戰由論壇炒到上去廉署。事緣「哪吒」方國珊，之前同港鐵委託嘅廣告公司簽定合約，租咗民建聯粉嶺個黃金靚位落廣告。但廣告公司上架前一日話因為工程原因，唔可以擺廣告。方國珊梗係㷫過辣雞，仲話懷疑港鐵受到民建聯施壓唔畀佢擺廣告，仲去埋廉署舉報。

方國珊發聲明話，舊年九月已經簽好合約，原定今年一月十六日到三月十一日，喺百和路行人天橋展示廣告。不過，廣告公司一月十日先同佢講，因「擴闊行人天橋及相關工程」，而唔可以安排更換廣告。

方國珊接受電話訪問時話，廣告牌嘅位置同天橋擴闊工程，一個喺左一個喺右，完全影響唔到，又引述土木工程拓展署嘅電郵都係咁講，佢認為冇得上架同民建聯有關。

「民建聯唔敢否定佢係要呢個廣告（位）嘅，因為年年都，包括周浩鼎呀、陳克勤呀，全部一定落呢個位嘅。」方國珊又提到，呢件事絕對唔會係散仔可以揸莊。佢認為今次係港鐵高層受到民建聯壓力，先會唔畀廣告上架。

「咁啱今次我叫做老虎頭上釘咗粒虱乸喇，我攞到呢個廣告牌，咁佢哋就好不忿氣嘅……如果佢咁明目張膽咁踢走我呢，就講唔過丫嘛。咁佢咪使橫手，一拍兩散，等我冇得攞到」。

方國珊上星期去咗廉署舉報港鐵受民建聯壓力，《壹》仔曾經向民建聯查詢，但截稿前未有回覆。其餘新界東立法會補選候選人包括黃成智、陳玉娥、鄧家彪、趙佩玉和范國威。

撰文：巫不言

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...