【空虛寂寞凍啊】男友何猷君唔現身送機 奚夢瑤坐何家車獨自離境

今年23歲嘅何猷君早排被發現同29歲嘅大陸名模奚夢瑤拍拖，雖然呢段係相差6年嘅姊弟戀，但何家一家都好滿意奚夢瑤，之前仲被影到佢同四房一家去曼谷旅行。啱啱年尾又有大陸網民喺香港AIA嘉年華撞到佢哋，兩個大忙人一有時間就見面拍拖。兩人長期雙隔兩地，唔係男飛去搵女，就女飛去搵男㗎啦。
呢日《壹》仔就喺香港機場見到奚夢瑤戴住帽同口罩出現。嚟得香港，一係做野一係嚟搵男友㗎啫，不過呢日佢孤身隻影離境，唔見何猷君送佢機喎。無男友送機，奚夢瑤自己推住兩個喼同兩個袋，雖然唔算好吃力，但就顯得有啲孤單囉！不過佢都好快手腳，機場又無乜人，佢熟手熟腳Check in之後就行入離境大堂。留意返，雖然今次無男友送機，但其實奚夢瑤坐架車，係何家嘅車嚟架，唔得閒送機都安排架車俾女友，算係唔話得啦！話時話，其實呢日只不過係12月中，12月中先離開香港，月尾又有人見到佢地去AIA玩，證明其實奚夢瑤都成日嚟香港搵何猷君啊，唔驚Long D感情會生疏啊。