【多謝蔣志光關心】陳康健感激奚秀蘭讓治療機會：真係好想死

患上罕有免疫系統疾病的同時，陳康健又跟女朋友分手，當時情緒爆煲，直認：「真係好想死嗰種感覺，好辛苦！病過嘅人會知道，一病會有幾多朋友，一般人唔知，睇你個樣無事喎，好健康喎！」

幸好忘年之交奚秀蘭支持他，明白他。
「因為佢又係半死咁樣，成日病得好犀利，無乜力，人哋睇落去以為佢好精神，其實佢連氣都抖唔到咁滯。」陳康健說。

雖然奚秀蘭自己患病，但仍然去關懷陳康健。他說：「佢好明白我，呢個長輩陪伴我過一段好難過嘅時間，因為佢好感同身受，呢方面令我覺得係有啲援手嘅。」

精神上支持他之外，奚秀蘭連自己本身的治療機會，都讓了給他。

「佢讓咗個位俾我，如果唔係我真係瞓喺條街度，第二日就有得睇，你可以話係上帝早有預備，因為我已經排緊另一個地方，要等兩三個月，點算呀大佬？我唔得呀，我真係好辛苦！」他非常感激。

另個長輩蔣志光也幫他很多，他對飲食好有心得，為陳康健調節飲食習慣，幫助抗病。陳康健表示：「我會叫佢做老師，佢喺我心目中係蔣老師，佢一家人對我好好。」

這個病令陳康健曾經抑鬱，但亦他更有同理心。「懂得睇到人哋嘅痛苦，會容易睇到，好容易代入人哋內心，去觀察嗰個人嘅時候，睇到佢裡面。」

經過低谷，他對楚原在金像獎的一番說話，特別感慨，並指楚原經歷人生的起跌後，仍能認為明天總比今天好，十分打動他。

「我被感動，聽到呢段說話，我喊呀，明天總比今天好，是真實的，好似我個病咁，要對明天有盼望！」他感慨說。

帶住這個盼望積極生活，相信陳康健亦會成為別人的祝福。

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...