【「聽」壹週刊28年】為視障人士錄壹仔故事 忠實讀者：風雨不改出書日錄音！

紙媒追求數碼化，買週刊的人買少見少，但李健裁逢星期三早上，風雨不改會去便利店買《壹週刊》，細閱後，再將挑選好的文章一字一句的讀出來。

李健裁在香港失明人協進會做義工，每星期會讀《壹週刊》的文章，製成錄音放在協會的熱線，視障人士可以打電話到熱線，收聽語音版的《壹週刊》。

李健裁這一讀，就讀了廿多年。閣下手上這期雜誌，將是她讀的最後一期紙本《壹週刊》。

逢星期三朝早，我都會去買最新一期嘅《壹週刊》。東涌間OK就最早有得賣！深水埗就好遲先有。買完之後，我就會揀好約十篇報導，去香港失明人協進會嘅錄音房，將文章一字一句錄下來，一錄就錄三、四個鐘。我本身做製衣，退休後開始為視障人士錄製錄音書同語音版報紙雜誌。

 

從不脫期

九十年代初起，香港失明人協進會會為視障會員提供熱線，會員打上去就可以聽語音版報紙或雜誌，包括《壹週刊》。我由嗰時開始，就會每星期嚟協會錄音，剪接後上載至熱線系統。後期有電腦發聲系統，報紙都係由系統發聲逐粒字讀出。但唯獨係《壹週刊》，一直以來都係真人發聲。

我從未試過脫期㗎！最多八號風球就會遲一日，就算去旅行我都會校啱時間，星期三、四要返到香港去錄音。

我由《壹週刊》創刊初期就開始睇，係最早期嗰批讀者。我初頭係《壹週刊》訂閱戶，之後又去協會讀《壹週刊》，咁樣一睇就睇左廿幾年喇。初初睇《壹週刊》，唔捨得丟，廿幾三十疊《壹週刊》收哂落床下底，啲仔女都鬧我做咩唔丟，我話得閒攞出嚟睇吓，後尾到搬屋嗰時先迫不得已丟晒。

 

被文字感動

我最鍾意《壹週刊》嘅文筆，有時會俾啲文字感動到，讀讀吓要停一陣，喊完先再讀，或者笑完先再讀。喺錄音室困三、四個鐘頭係幾攰，但個心又滿心歡喜，因為你岩岩做完一件歡喜事。

我讀左《壹週刊》十幾年，風雨不改。只係以前好厚嘅《壹週刊》，而家愈來愈薄，但照樣錄九十分鐘，咁就好難揀料讀。傳比會員嘅方式都改咗幾轉喇，九十年代寄錄音帶比啲會員，後尾轉做寄MP3碟，再到而家用電腦錄音再擺上熱線，都一樣繼續錄。可惜時代變遷，好多嘢想留都留不住了。

 

撰文：鄭靖而
攝影：黃雲慶

 

 

相關連結：

【「聽」壹週刊28年】視障讀者：放假就打電話聽壹週刊
http://bit.ly/2Hu8oSs

《壹週刊》28周年，無懼風波，堅持敢言，壹直企硬。


2018年改革版《壹週刊》流動應用程式，換上耳目一新的設計，讓用戶更易於瀏覽各式新聞影片及圖文資訊，立即按此連結下載最新版本 iOS及Android APP，即可體驗精彩不絕內容：https://goo.gl/NVySCK

壹週刊 : http://nextplus.hk/
即 like 壹週刊 fb : http://www.facebook.com/nextmagazinef...